Aleanca për Ardhmërinë e Kosovës i ka dalë në mbrojtje deputetit të saj, Daut Haradinaj, deklaratë e cila ka nxitur reagimin edhe të faktorit ndërkombëtar në vend, por edhe të atij vendor.

Sipas AAK-së, deklarata e deputetit Haradinaj është nxjerrë nga konteksti dhe nuk ka qenë thirrje për spastrim etnik, “siç e kanë paraqitur disa media”, por ngritje e alarmit për provokimet e Serbisë ndaj Kosovës, edhe përmes rastit të ish-kryeministrit Ramush Haradinaj, të cilat do të mund të kishin pasoja të rënda për të gjithë!

“Edhe nëse në deklaratën e deputetit Haradinaj ka pasur tone emocionale, ato duhet parë si të tilla”, thotë AAK

“Për të gjithë ata që nuk e dinë, ju kujtojmë së Ramush Haradinaj e ka mbrojtur popullatën civile e fëmijët në Kosovë. Ramush Haradinaj i ka mbrojtur kishat serbe në Kosovë. E ka mbrojtur popullatën serbe dhe në kohë paqe, ka krijuar programe për integrimin e serbëve në institucionet e Kosovës. I pari ka dal hapur kundër ekstremizmit fetar. Dhe pikërisht tani, disa njerëz e disa qarqe, brenda dhe jashtë Kosovës, po duan që duke e izoluar Ramush Haradinajn ta provokojnë një situate tjetër të rrezikshme në Kosovë”, thotë më tej AAK.

Kjo parti thotë se bashkë me deputetët e saj, pa përjashtim, “janë të përcaktuar për shtet ligjor e të drejtë, ku të gjithë qytetarët, pavarësisht përkatësisë etnike, të kenë të drejta të barabarta”.

“Por në asnjë rrethanë dhe asnjëherë, nuk do të pajtohemi me provokimet që po na i bënë Serbia, edhe përmes rastit të Ramush Haradinajt. Sot është koha e fundit që t’u thuhet stop këtyre provokimeve, për çka ne llogarisim seriozisht edhe në ndihmën e partnerëve tanë”, deklaron AAK.

“Boshti i problemit nuk janë deklaratat e politikanëve në Kosovë, por veprimet konkrete të Serbisë, brenda dhe jashtë territorit të Kosovës”, përfundon ky subjekt politik.

Kujtojmë se deputeti Haradinaj, ditë më parë kishte deklaruar se nëse Serbia e do Kosovën etnikisht pa serbë, atëherë le të bëjnë hajgare.

“Munden me na fut në luftë, asgjë tjetër. Unë nuk e di për të tjerët, por unë e di për vete se në rast se gabojnë dhe bëjnë kësi veprime, atëherë të bëhen gati për tema më serioze. Nëse e duan Kosovën etnikisht pa serbë, atëherë le të bëjnë hajgare”, kishte thënë Haradinaj në një emision televiziv në RTV Dukagjini.